Mánaðarskýrsla lögreglunnar á höfuðborgarsvæðinu kom út í dag og hefur þar að geyma tölur um tilkynnt afbrot í umdæmi hennar, brotið niður eftir löggæslusvæðum og afbrotaflokkum. Ekki er að sjá á öðru en að skýrslan geymi að mestu góðar fréttir þó mikil fjölgun sé í leit að týndum ungmennum. Segir í skýrslunni að fjöldi leitarbeiðna hafi aukist töluvert miðað við útreiknuð efri mörk fyrir bæði sex og tólf mánaða meðaltal. Þó er ástandið betra en það var að meðaltali milli áranna 2017 og 2019.
Eins og sagt var frá í fjölmiðlum dróst fjöldi tilkynntra afbrota eitthvað saman á meðan á samkomubanni stóð og því vekur það athygli að sjá ekki meiri fjölgun frá Covid-mánuðunum mars og apríl og þar til nú.
Flestir flokkar afbrota eru „innan marka“ samkvæmt skýrslunni utan eignaspjalla, sem fjölgar lítillega á 6 mánaða meðaltali, nytjastulds vélknúinna ökutækja sem fækkar mikið, fíkniefnabrotum sem fækkar lítillega og umferðarlagabrotum sem fjölgar.
Fjöldi tilkynntra kynferðisbrota stendur í stað á sex mánaða og tólf mánaða meðaltali, en fjöldi þeirra hefur þó fækkað umtalsvert til lengri tíma litið. Hefur þeim fækkað um heil 51% en að meðaltali á sama tímabili s.l. þrjú ár á undan ef litið er til dagsetningu brota og 24% ef litið er til dagsetningu tilkynningar.
Eins og fyrr sagði hefur orðið umtalsverð fjölgun í beiðnum um leit að týndum ungmennum í júní og hefur þeim fjölgar um meira en helming á síðastliðnum 12 mánuðum. Talsverð fækkun hefur svo orðið á nytjastuldi ökutækja en þeim hefur fækkað um þriðjung á árstímabili og um 11% á þriggja ára tímabili.
134 voru stöðvaðir fyrir akstur undir áhrifum ávana- og fíkniefna og eru það umtalsvert fleiri en voru stöðvaðir fyrir akstur undir áhrifum áfengis, en þeir voru 76 á tímabilinu. Fjöldi þessara brota og hlutfall þeirra á milli hefur verið nokkuð stöðugt undanfarna tólf mánuði og því ljóst að akstur undir áhrifum ávana- og fíkniefna er umtalsvert algengari en akstur undir áhrifum áfengis.
Skýrsluna má nálgast í heild sinni hér.
