Þann 1. maí hrapaði lítil flugvél í Amazonskóginum í Kólumbíu. Fjögur börn, 11 mánaða, 4 ára, 9 ára og 13 ára, lifðu hrapið af og hefur verið leitað síðan. Yfirvöld telja að börnin séu á lífi.

Kólumbíski herinn skýrði frá þessu. Hann hefur leitað að börnum vikum saman og hefur meðal annars kastað dreifimiðum niður í skóginn auk matarpakka.

Flugmaðurinn og móðir barnanna létust í flugslysinu. Flugmaðurinn var leiðtogi frumbyggja og börnin og móðir þeirra eru einnig af ættum frumbyggja.

Flugherinn telur að börnin hafi ráfað um skóginn síðan flugslysið átti sér stað.

Gervihnattarmyndir sýna í hvaða átt þau hafa gengið og leitarfólk hefur fundið ýmsar eigur þeirra auk skýlis sem var byggt úr trjágreinum. Í síðustu viku fundu þeir skó og bleiu.

„Út frá þeim sönnunargögnum sem við höfum fundið, höfum við komist að þeirri niðurstöðu að börnin séu á lífi,“ sagði Pedro Sanchez, hershöfðingi, sem stýrir leitinni.

„Ef þau væru dáin væri auðvelt að finna þau, því þau myndu liggja kyrr og hundarnir myndu finna þau,“ bætti hann við.

Leitarsvæðið er um 320 ferkílómetrar og eru um 200 hermenn við leit auk frumbyggja sem þekkja vel til skógarins. Flugherinn hefur kastað um 10.000 dreifimiðum, bæði á spænsku og tungumáli barnanna, niður auk matarpakka. Á miðunum stendur að börnin eigi að vera rólega og halda kyrru fyrir. Auk þess eru ýmis góð ráð á þeim um hvernig er hægt að lifa dvölina í frumskóginum af.

Sanchez sagði að leitarmenn telji að börnin séu í innan við 100 metra radíus frá þeim en slæmt veður, þykkur gróður og mýrlendi gerir leitarmönnum erfitt fyrir við að komast til þeirra.

Fjölskylda barnanna segir að elsta barnið þekki skóginn vel.