Í umdæmi lögreglustöðvar 3, sem sinnir Kópavogi og Breiðholti, var gerð athugasemd við rekstur snyrtistofu. Að sögn lögreglu virðist starfsemin ekki hafa verið samkvæmt lögum um slíkan rekstur.
Í dagbók lögreglu kemur fram að málið tengist öðru máli þar sem maður var handtekinn vegna gruns um akstur undir áhrifum fíkniefna, vörslu á talsverðu magni fíkniefna, peningaþvætti og fleira. Fékk sá pláss í fangageymslu lögreglu vegna málsins.
Í umdæmi lögreglustöðvar 2, sem sinnir Hafnarfirði og Garðabæ, var tilkynnt um ungmenni á krossurum innan um börn á leiksvæði. Ungmennin tvístruðust og fóru hvert í sína áttina þegar þau urðu vör við lögreglu. Í dagbók lögreglu kemur þó fram að upplýsingar liggi fyrir um heimilisföng hluta þessara ungmenna.
