Fréttablaðið skýrir frá þessu í dag. Haft er eftir Berglindi Karlsdóttur, deildarstjóra hjá Sjúkratryggingum Íslands, að málin átta sem eru komin inn á borð stofnunarinnar séu misalvarleg. „Við sjáum allt frá yfirliði upp í blóðtappa,“ sagði hún.
Enginn hefur sótt um bætur vegna tímabundinnar lömunar en með lagabreytingu um áramótin var bótaskylda vegna bólusetninga gegn COVID-19 rýmkuð. „Bótaskyldan er víðtækari að því leyti að almennt eru bara sjaldgæfar og alvarlegar aukaverkanir tryggðar. Það var tekið út varðandi Covid-19 bólusetninguna. Eina skilyrðið er að tjónið nái lágmarksbótum sem er í kringum 121 þúsund krónur. Það getur verið bæði líkamlegt tjón eða vinnutjón svo dæmi séu tekin,“ sagði Berglind.
Hún sagði að enn hafi ekki verið tekin afstaða til hvort málin séu bótaskyld.
Þrjár ungar stúlkur fengu hver um tíu milljónir í bætur árið 2015 vegna aukaverkana í kjölfar bólusetningar við svínainflúensu en þær fengu drómasýki í kjölfar bólusetninga og var örorka þeirra metin 75% en það er hámarks örorka.
Tjón vegna bólusetninga á þessu ári þarf að lágmarki að nema 121.047 krónum svo bótaskylda sé fyrir hendi en hámarksgreiðsla er 12,1 milljón króna.
