Landsliðskonurnar Glódís Perla Viggósdóttir og Karólína Lea Vilhjálmsdóttir voru gestir Helga Fannars Sigurðssonar í nýjasta þætti af Íþróttavikunni.
Glódís, sem er auðvitað fyrirliði landsliðsins, jafnaði landsleikjamet Söru Bjarkar Gunnarsdóttur í sigrinum á Úkraínu á dögunum og í dag mun hún, ef allt er eðlilegt, slá metið gegn Englandi á Laugardalsvelli.
Karólína er góð vinkona Glódísar og segir hún að það sé ekki að sjá að hún sé að ná þessu afreki í samtölum við hana.
„Ég er auðvitað mjög náin henni og þetta er einhver hógværasta manneskja sem ég hef kynnst. Maður myndi ekki vita af afrekunum sem hún hefur náð ef maður talar við hana.“
Glódís er eðlilega stolt af afrekinu en er uppteknari að leikjunum sjálfum á meðan hún spilar.
„Þetta er gríðarlega stórt og maður er ótrúlega stoltur af þessu. En þú ert í rútínu að fara að spila leik og það skiptir miklu meira máli. Eftir leik getur maður svo farið að spá í þessu.
Ég er búin að vita af þessu í smá tíma og það er ótrúlega gaman að þetta lendi þannig að við eigum tvo leiki heima á Íslandi. Það er mjög sérstakt að geta gert þetta hér með stelpunum, fjölskyldunni minni og öllum sem hafa verið með mér í gegnum þetta allt.“
Nánar í spilaranum.
