Björgunaraðgerðir hafa staðið yfir, en í morgun að staðartíma lést einnig kafari úr strandgæslu Maldíveyja sem tók þátt í leitinni.
Liðþjálfinn Mohammed Mahudhee, reyndur björgunarkafari hjá strandgæslu landsins, veiktist meðan á aðgerðunum stóð og var fluttur á sjúkrahús þar sem hann lést síðar.
Her Maldíveyja heiðraði minningu hans í yfirlýsingu og sagði hugrekki hans og fórnfýsi verða ávallt í minnum höfð.
Sjá einnig: Móðir og dóttir meðal fimm sem létust í harmleiknum á Maldíveyjum
Lík köfunarkennarans Gianluca Benedetti fannst skömmu eftir slysið, en leit að hinum fjórum stendur enn yfir. Yfirvöld rannsaka nú hvað fór úrskeiðis og hefur nokkrum kenningum verið varpað fram.
Meðal þeirra sem létust voru Monica Montefalcone, 51 árs prófessor í sjávarvistfræði við Háskólann í Genúa, og dóttir hennar Giorgia Sommacal, 22 ára. Hin fórnarlömbin voru Muriel Oddenino, Federico Gualtier auk Benedetti.
Carlo Sommacal, eiginmaður Montefalcone og faðir Giorgiu, sagði í samtali við ítalska fjölmiðla að GoPro-myndavél sem eiginkona hans var líklega með á sér gæti hugsanlega varpað ljósi á slysið.
„Monica var yfirleitt með GoPro þegar hún fór að kafa. Ef hún var með hana þennan dag gæti upptakan hjálpað okkur að skilja hvað gerðist,“ sagði hann.
Sérfræðingar hafa gagnrýnt ákvörðun hópsins um að kafa niður í hellinn. Veðurviðvörun var í gildi á svæðinu og talið er að öldugangur hafi getað valdið slæmu skyggni neðansjávar.
Þá er ferðamönnum almennt bannað að kafa dýpra en 30 metra á Maldíveyjum, en hópurinn var á um 50–60 metra dýpi þegar slysið varð.
Talsmaður stjórnvalda á Maldíveyjum sagði hellinn afar hættulegan og að jafnvel reyndustu kafarar reyndu yfirleitt ekki að nálgast hann.
