Í rannsóknargögnum málsins er vísað til mats sérfræðinga sem telja mögulegt að þreyta eftir langa vinnuvakt og líkamlegt ástand eftir neyslu á fituríkri McDonalds-máltíð hafi haft sitt að segja um tildrög slyssins.
Corrinne, sem er 31 árs, var handtekin 30. apríl síðastliðinn vegna slyssins sem varð í nóvember 2024. Þrír lögreglumenn úr Palm Beach-sýslu létust þegar hún ók jeppabifreið sinni á lögreglumennina þar sem þeir voru við störf við vegkant.
Samkvæmt lögreglu höfðu lögreglumennirnir stöðvað vegna bilunar í einu ökutækja sinna og biðu eftir vegaaðstoð þegar slysið varð um klukkan 9:15 að morgni 21. nóvember 2024.
Corrinne starfaði sem hjúkrunarfræðingur á Cleveland Clinic-sjúkrahúsinu í Weston í Flórída. Í handtökuskýrslu kemur fram að hún hafi unnið tólf tíma vakt og síðan verið um klukkustund lengur í vinnunni til að ljúka pappírsvinnu. Á leiðinni heim hafi hún stoppað á McDonald’s-veitingastað um hálftíma áður en slysið varð.
Í rannsóknargögnunum er vitnað til sérfræðings í mannlegri hegðun sem telur mögulegt að fitu- og kolvetnaríkur hafi valdið því sem kallast postprandial fatigue, eða eftir-máltíðarþreytu, sem er sögð tengjast skertri einbeitingu og einskonar heilaþoku.
Þá er einnig vitnað til taugalæknisins Richard Boehme, sem var fenginn til að leggja mat á möguleg áhrif þreytu og líkamlegs ástands á aksturinn. Samkvæmt skýrslunni taldi hann að vinnuþreyta og mögulegt ástand eftir neyslu á máltíðinni gætu hafa átt þátt í aksturshegðun Corrinne.
Ekki kemur þó fram í rannsóknargögnum að þessir þættir hafi verið staðfest orsök slyssins, heldur er um að ræða mögulegar skýringar sem sérfræðingar ræddu við rannsókn málsins.
Eiturefnarannsókn sýndi að hvorki áfengi né fíkniefni fundust í blóði hennar. Vitni á vettvangi sagði lögreglu að Blue hefði virst „afar þreytt“, en hún sjálf neitaði því að hafa verið þreytt eða að flýta sér.
Blue sagði lögreglu að hún hefði fylgt GPS-leiðsögn þegar hún reyndi að fara fram úr hægfara ökutæki og misst stjórn með þeim afleiðingum að hún ók á lögreglumennina þrjá. Lögreglan segir engin merki hafa fundist um að farsímanotkun hafi truflað hana við aksturinn.
