Að auki var maðurinn sakfelldur fyrir að hafa nauðgað fyrrum eiginkonu sinni þrisvar sinnum þegar þau voru gift en það ofbeldi átti sér stað 2010. Saksóknari krafðist sjö til átta ára fangelsis yfir manninum og dómari dæmdi hann í sjö ára fangelsi. Maðurinn áfrýjaði dómnum samstundis til Vestri Landsréttar en hann hefur haldið fram sakleysi sínu frá upphafi. Hann hefur setið í gæsluvarðhaldi í rúmt ár.
Samkvæmt fréttum danskra fjölmiðla notaði maðurinn stefnumótasíðu til að komast í samband við fjölda karla sem hann fékk til að nauðga eiginkonu sinni. Vegna andlegrar fötlunar sinnar var hún ekki fær um að veita viðnám eða mótmæla og því var um nauðgun að ræða samkvæmt lögum. Maðurinn tók stundum sjálfur þátt í ofbeldinu með öðrum körlum. Hann er sagður hafa útbúið leiðbeiningabækling um hvernig ofbeldið ætti að fara fram og birt á Internetinu.
Ofbeldið stóð yfir í mörg ár og á sama tíma beitti maðurinn konuna margvíslegu ofbeldi, bæði andlegu og líkamlegu, og var hann einnig sakfelldur fyrir það.
Maðurinn var fundinn sekur um flest þeirra níðingsverka sem hann var ákærður fyrir en hann var sýknaður af ákæru um að hann hefði þvingað konuna í ófrjósemisaðgerð.
Karlarnir, sem maðurinn fékk til að nauðga konu sinni, voru ekki ákærðir þar sem ákæruvaldið taldi þá ekki hafa haft ásetning um að nauðga konunni.