Því var velt upp í Dr. Football í dag hvort einhver þjálfari í Bestu deild karla fengi að fjúka fyrir landsleikjahlé í byrjun júní. Horfðu menn aðallega í Garðabæinn í því samhengi.
„Ég held það verði einn þjálfari farinn og ég held það verði í Garðabæ,“ sagði Ragnar Bragi Sveinsson í þættinum og á þar við Jökul Elísabetarson, þjálfara Stjörnunnar.
Eftir tvo sigra í byrjun móts hefur hallað undan fæti hjá Stjörnunni og liðið tapað þremur leikjum í röð.
„Ég hitti Garðbæinga í gær og þeir voru með áhugavert skúbb: Ef Jökull verður látinn fara eru Stjörnumenn að íhuga að taka bara Rúnar Pál aftur frá Gróttu,“ sagði Albert Brynjar.
Rúnar gerði Stjörnuna að Íslandsmeisturum árið 2014 en Albert tók fram að um sögusagnir væru að ræða.
„Þetta er það sem Stjörnumenn vilja, hvort það sé óskhyggja eða ekki veit ég ekki. Þetta er algjört slúður.“
