Þetta hefur BT eftir Mads Toudal Frandsen, lektor við Syddansk Universitet, en hann er jafn undrandi og aðrir á þessu.
Í fréttatilkynningu frá Syddansk Universitet kemur fram að ítölsk rannsóknarstöð hafi numið merkin þann 17. júní og enn hafi ekki verið hægt að útskýra þau. Rannsóknarstöðin er notuð til rannsókna á hulduefni.
Frandsen sagði að hugsanlega eigi merkin upptök sín í öreindum sem hafi ekki uppgötvast áður. Hann sagði að varast þurfi að oftúlka merkin en það megi hins vegar ekki draga úr því að hér sé um stóran atburð að ræða ef um nýja öreind sé að ræða. Það sé þá í fyrsta sinn síðan tilvist Higgsbóseindarinnar var staðfest 2012 að ný öreind finnst.