Héraðsdómur Suðurlands hefur dæmt tyrkneska bæjarstjórann Senol Kul til þess að greiða 230.000 þúsund króna sekt í ríkissjóð fyrir umferðarlagabrot. Verði greiðslan ekki innt af hendi innan fjögurra vikna þá þarf Kul að sæta fangelsi í 16 daga. Að auki er Kul sviptur ökurétti í tvo mánuði en dómurinn var kveðinn upp að bæjarstjóranum fjarstöddum.
Eins og DV greindi frá þann 31. ágúst síðastliðinn var bæjarstjórinn tekinn á 152 kílómetra hraða á klukkustund á Suðurlandsvegi fyrr í sumar þar sem leyfður hámarkshraði var 90 km/klst. Keyrði Kul um á Toyota Yaris-bifreið sem hann hafði leigt af gistiheimili á höfuðborgarsvæðinu.
Oftast eru slík mál til lykta leidd á staðnum með greiðslu sektar en að öllum líkindum viðurkenndi ökuþórinn ekki brotið á staðnum og því fór það sína leið í kerfinu.
Ólíklegt verður að teljast að sekt Kul fáist nokkru sinni greidd. Íslensk yfirvöld eru aðeins með samning við Norðurlönd um innheimtu sekta og sakarkostnaðar og er virk innheimta þar á milli.
„Innheimta í öðrum ríkjum er háð greiðsluvilja sektarþola og frumkvæði hans,“ segir í svari frá Innheimtustofnun.
Ef bæjarstjórinn hunsar því málið og heimsækir ekki Ísland í bráð þá hafa íslensk yfirvöld því enga möguleika á að innheimta sektina.
Senol Kul, sem er fæddur árið 1960, er vinsæll bæjarstjóri fyrir stjórnmálaflokkinn AKP, sem er flokkur Recep Erdogan, forseta Tyrklands. Hann starfaði meðal annars í ferðamannabransanum og sem leiðsögumaður áður en hann hellti sér í pólitíkina og hafði yndi af því að heimsækja ný lönd.
Um það leyti sem hann fékk sektina á Íslandi var hann á ferðalagi á Norðurlöndum og birti hann til að mynda myndir frá Færeyjum og Noregi á Instagram-síðu sinni þar sem hann er afar virkur. Hann birti þó engar myndir frá Íslandi.
DV hefur sent bæjarstjóranum fyrirspurn vegna dómsins og hvort hann muni koma til með að greiða sektina. Engin svör hafa enn borist.
