Myndband á TikTok sýnir augljóslega gríðarlega ótraustar aðstæður við íshellaskoðun á sumrin. Trépallar hafa verið settir upp til þess að koma fólki inn í bráðnandi hellinn og beljandi fljót streymir út úr honum.
Erlendur ferðamaður birti myndbandið fyrir um viku síðan á samfélagsmiðlinum en það var tekið upp í júlí mánuði á síðasta ári. Gríðarlega umdeilt er að fara með ferðamenn í íshellaferðir á sumrin og myndbandið sýnir vel hvers vegna svo er. Vatnajökulsþjóðgarður hefur beðið ferðaþjónustufyrirtæki að stöðva íshellaferðir í kjölfar banaslyssins á Breiðamerkurjökli á sunnudag.
Í myndbandinu sést ferðamaðurinn ganga að íshellinum. Búið er að setja upp mjóa tréplanka á milli klakabunka og snæri fest í ísinn með fram plönkunum.
Fyrir neðan er gil og ólgandi straumur úr bráðnandi hellinum og augljóst er að ekki má mikið út af bera til þess að sá sem gengur þar um falli í gilið. Á einum stað þarf að klifra upp þrep sem virðast vera höggvin í ísinn.
Þegar í hellinn sjálfan er komið sést að lekur vatn ofan úr „loftinu“ í stríðum straumum. Loftið er þykkt og ekki myndi þurfa að spyrja að leikslokum ef það myndi hrynja ofan á einhvern.
@joannadominiak4 #iceland #icecave #glaciers #icelandtour #przygoda #🇮🇸 #🧍♀️ #spacer #🏔️ ♬ dźwięk oryginalny – Joanna Dominiak
„Það er augljóst að þetta eru ekki öruggustu staðirnir til að vera á,“ segir einn netverji í athugasemdum við færslu ferðamannsins.
Íshellar verða til vegna vatnsstreymis til og frá jöklum. Þó að sumir íshellar séu þekktir ferðamannahellar, svo sem hellarnir Kristall og Safír, þá eru þeir hins vegar síbreytilegir vegna bráðnunar.
Oft hafa hellismunnar færst til, jafn vel um hundrað metra á einu sumri. Vatnafarið er það sama en hvelfingin orðin allt önnur og því í raun ekki um sama helli að ræða. Bráðnunin hefur verið mjög hröð á undanförnum árum, bæði vegna hlýnandi loftslags og vegna öskulags úr eldgosum undanfarinna ára sem sést glöggt á myndum.
Oftast nær rennur straumur bráðnandi vatns út úr hellinum. Það er hins vegar ekki alltaf raunin því í sumum tilfellum má finna straum renna inn í jökulinn. Það getur verið stórhættulegt að falla í slíkt fljót því þá er mikil hætta á að viðkomandi renni undir jökulinn og sjáist ekki meir.
