Greint var frá því í gær að RÚV hefði ákveðið að rjúfa tengsl á milli Söngvakeppninnar og þátttöku Íslands í keppninni í vor. Þetta þýðir að undankeppnin, það er sjálf Söngvakeppnin, verður haldin en ákvörðun verði tekin síðar um það hvort Ísland taki þátt í Eurovision eða ekki. Það verði meðal annars gert í samráði við sigurvegara keppninnar.
Páll Magnússon, sem var útvarpsstjóri á árunum 2005 til 2013, gerir athugasemd við þetta í umræðum undir Facebook-færslu fjölmiðlamannsins Jakobs Bjarnars Grétarssonar.
„Mér finnst það nú ekki stórmannlegt hjá RÚV að setja listafólkið í skotlínuna til að koma sjálfu sér í skjól,“ segir Páll í athugasemd við færslu Jakobs.
Í Facebook-færslu sinni sagði Jakob:
„Ef ég væri skeptískur, sem ég er auðvitað ekki, teldi èg að verið sé að fífla mannskapinn og það heldur billega. Fyrst þarf að fara óáreittur um auglýsingamarkaðinn, viðburðahaldið og símakosninguna áður en gefið er grænt ljós á þátttöku.“
Fleiri hafa tjáð sig um þessa ákvörðun RÚV og er Björgvin Halldórsson, sem keppti fyrir Íslands hönd í Eurovion árið 1995. „Mikið er lagt á sigurvegarann,“ sagði Björgvin við færsluna.
Sveinn Waage, markaðsstjóri og fyrirlesari, leggur einnig orð í belg við færsluna og segir:
„Það er óhjákvæmilegt að keppnin sjálf og atkvæði litist sterklega af þessari ákvörðun. Ætlar þú að kjósa þann sem vill deila sviði með Ísrael eða ekki fara út? Andvana fætt klúður.“
DV greindi í morgun frá Facebook-færslu Marðar Áslaugarsonar, fulltrúa Pírata í stjórn RÚV, sem sagði einmitt að stjórnendur stofnunarinnar væru með þessu að varpa allri ábyrgðinni á þátttöku RÚV í Eurovision á listafólkið sem tekur þátt í Söngvakeppninni.
Sjá einnig: Stjórnarmaður RÚV allt annað en sáttur við ákvörðunina í gær
„Þetta er auðvitað win win fyrir stjórnina og stjórnendur. Þetta stórkostlega trix firrir okkur algerlega allri ábyrgð á þessa gríðarlega mikilvægu ákvörðun og þeir sem verða brjálaðir út af niðurstöðunni, hver sem hún verður, munu beina bræði sinni að þessu listafólki en ekki að okkur,“ sagði Mörður í færslu sinni og bætti við:
„Þetta held ég að sé alveg meiriháttar. Ég held að einkunnarorð RÚV ættu að vera þessi: Hugrekki, heilindi, ábyrgð.
