Tveimur mínútum eftir að skilaboðin voru send fylgdu önnur í kjölfarið: „Allt sem getur valdið Bandaríkjunum áhyggjum eða verið vandræðalegt fyrir þau er vel þegið.“
Sendandi skilaboðanna var Daniel Woo, sem er kínverskur leyniþjónustumaður, og móttakandinn var Frank Creyelman, belgískur stjórnmálamaður úr röðum hægri manna. Hann hefur meðal annars setið á belgíska þinginu fyrir flokkinn Vlaams Belang sem er lengst til hægri á hinum pólitíska litrófi stjórnmálanna.
Í rúm þrjú ár var hann á mála hjá kínverskri leyniþjónustu og fékk greitt fyrir. Þetta kom fram í umfjöllun Der Spiegel, Financial Times og Le Monde í desember.
Í kjölfar afhjúpana blaðanna var Creyelman rekinn úr flokknum og fyrir nokkrum dögum hóf belgíska lögreglan rannsókn á málum honum tengdum. Hann er meðal annars grunaður um spillingu.
Fjölmiðlarnir komust yfir mörg hundruð sms sem fóru á milli Creyelman og Woo sem er sagður starfa fyrir leyniþjónustu Ríkisöryggisráðuneytis Kína.
Svo virðist sem Woo hafi ráðið Creyelman til starfa til að hafa áhrif á umræður og gagnrýni í Evrópu hvað varðar málefni á borð við lýðræðishreyfinguna í Hong Kong og samband Kína og Taívan auk kúgunar á minnihlutahópi múslima í Xinjiang-héraði.
Creyelman reyndi margoft að vinna gegn ályktunum sem beindust gegn Kína og eitt af verkefnum hans var að eyðileggja traust í garð Adrian Zenz, sem er þýskur vísindamaður sem hefur gagnrýnt hvernig kínversk yfirvöld fara með fyrrgreinda múslima í Xinjiang og brot á mannréttindum.
Woo lét Creyelman einnig í té drög að ræðum varðandi COVID-19 og voru þær mjög hliðhollar Kínverjum.
Verkefni send í smáskilaboðum
Það sem hefur vakið mesta athygli í Brussel og hjá evrópskum stjórnmálamönnum eru smáskilaboðin um að „kljúfa samband Bandaríkjanna og Evrópu“. Þessi skilaboð sendi Woo til Creyelman skömmu áður en Olaf Scholz, kanslari Þýskalands, og Emmanuel Macron, forseti Frakklands, heimsóttu Kína í árslok 2022.
Woo bað Creyelman um að sannfæra tvo hægrisinnaða þingmenn á Evrópuþinginu um að lýsa því opinberlega yfir að Bandaríkin og Bretland græfu undan evrópsku orkuöryggi. „Aðalhugmyndin er að ráðast á evrópska leiðtoga og veikja Bandaríkin,“ stóð í einum skilaboðunum frá Woo að sögn Jótlandspóstsins.
Í öðrum skilaboðum kom fram að Woo greiddi Creyelman fyrir „verkefnin“ með rafmynt.
Creyelman er einnig þekktur fyrir, og umdeildur, fyrir að styðja hernað Rússa í Úkraínu. Hann sat á belgíska þinginu frá 1999 til 2007. Hann situr nú í bæjarstjórninni í Mechelen og er sagður vera stjórnmálamaður með gríðarlega stórt tengslanet.
