Þegar þú ert að taka við nýju húsi eða íbúð, þá er það tómt og því kjörið tækifæri að þrífa það hátt og lágt. Þannig getur fjölskyldan flutt inn í hreint og gott umhverfi og það skiptir máli því enginn vill taka við drasli og drullu fyrri íbúa.

Southern Living segir að þegar þrifið er áður en flutt er inn í nýtt húsnæði, þá sé best að þrífa eftirfarandi hluti vel og vandlega.

Eldhústæki – Þetta er eitt það mikilvægasta að sögn Southern Living. Þrífðu eldavélina, ofninn og ísskápinn áður en fita og drulla byrjar að safnast fyrir við daglega notkun þessara tækja. Nýttu þér að allt er tómt, þú getur fært tækin úr stað og þrifið bak við þau og undir.

Skápar – Þrífðu skápana vel áður en þú setur nokkuð í þá. Kannaðu líka hvort það leki einhvers staðar, hvort það sé mygla eða ummerki eftir meindýr. Það er miklu auðveldara að leysa þessi vandamál áður en þú flytur inn.

Baðkar og sturta – Sótthreinsaðu baðkarið, flísarnar og samskeyti. Southern Living segir að jöfn blanda vatns og hvíts ediks sé frábær til að losna við sápuleifar. Notaðu tækifærið til að kanna hvort niðurföllin séu stífluð.

Klósettið – Það er nú ekki það mest spennandi að þrífa klósett en það þarf víst að gera það. Þrífðu það hátt og lágt, að innan sem utan. Ef setan er mislit, þá ættirðu að setja nýja.

Hurðarhandföng og innstungur – Það safnast oft ryk og fingraför á þessa fleti. Notaðu rakan klút með sápu eða sótthreinsiefni og mundu að láta ekki of mikinn raka koma nálægt innstungunum.

Lofttúður – Þrífðu lofttúðurnar mjög vel til að koma í veg fyrir að ryk og hár sé á ferðinni um heimilið. Ryksugaðu þetta og gættu sérstaklega vel að lofttúðunum á baðherberginu.

Loftljós og lampar – Hreinsaðu ryk af loftljósum og lömpum og þvoðu skítugt gler.

Listar og hurðarkarmar – Notaðu rakan klút til að þrífa dyrakarma, gólflista og ramma. Byrjaðu efst og farðu niður á við.

Gólfin – Það er snilldarráð að þrífa gólfin vel áður en flutt er inn. Ryksugaðu og skúraðu allt húsnæðið.