Rússar eiga ekki í mörg hús að venda ef þeir vilja fara út fyrir landsteinana. Víða eru þeir óvelkomnir vegna innrásarinnar í Úkraínu. En það á ekki við í Argentínu og það nýta barnshafandi konur sér í miklum mæli.

Í grein í The Guardian kemur fram að rússneskar konur streymi til Argentínu til að geta fætt börn sín þar. Ástæðan er að þau börn sem fæðast í landinu fá sjálfkrafa ríkisborgararétt og því eru börnin með tvöfaldan ríkisborgararétt.

„Þegar við sáum að landamærin í kringum okkur fóru að lokast, vissum við að við þurftum að finna stað sem væri auðvelt að ferðast til. Argentískt vegabréf mun opna margar dyr fyrir barnið mitt,“ sagði Polina Cherepovitskaya í samtali við The Guardian.

Hún varð barnshafandi fljótlega eftir innrásina og fór þá að huga að því að komast úr landi. Þegar hún kom til Argentínu sá hún að fleiri rússneskar konur höfðu fengið sömu hugmynd og hún því á fæðingardeildinni voru átta rússneskar konur í röð á undan henni.

Það er auðvelt fyrir Rússa að komast inn í landið og auðvelt fyrir þá að framlengja 90 daga dvalarleyfi sitt og sækja um landvistarleyfi. Þá er einnig auðveldara að fá argentínskan ríkisborgararétt ef barn umsækjanda fæddist í landinu.