Kjósendur Viðreisnar eru jákvæðastir gagnvart veggjöldum en Sósíalistar neikvæðastir. Fleiri eru neikvæðir en jákvæðir gagnvart þeim.
Þetta kemur fram í nýrri könnun Maskínu þar sem spurt var um veggjöld. Það er hvort væri fylgjandi því að taka upp veggjöld eða tolla til þess að standa straum af rekstri þjóðvega.
Fjármálaráðherra hefur það nú til skoðunar að hefja gjaldtöku á ný við Hvalfjarðargöng. Einnig að taka upp veggjöld við Reykjanesbraut og Suðurlandsveg, það er á öllum helstu leiðum út úr höfuðborgarsvæðinu. Yrði þetta gert til að fjármagna innviðafélag sem fjármagnar samgöngumannvirki á borð við Sundabraut, Fljótagöng og Ölfusárbrú.
Kjósendur virðast þó ekki vera fylgjandi þessum áætlunum ef marka má hina nýju könnun. 42,6 prósent eru andvíg, þar af 23,7 prósent mjög andvíg. Aðeins 37,3 prósent eru fylgjandi veggjöldum, þar af 10,1 mjög fylgjandi. 20,1 prósent svöruðu hvorki né.
Mestur er stuðningurinn á Norðurlandi, 47 prósent. Þá kemur Reykjavík með 41 prósenta stuðning, Vesturland og Vestfirðir með 37 prósent, nágrannasveitarfélög Reykjavíkur 35, Austurland 34 en neikvæðin er langmest á Suðurlandi og Suðurnesjum. Þar styðja aðeins 24 prósent veggjöld.
Munur er nokkur þegar litið er til stjórnmálaskoðana. Kjósendur Viðreisnar, flokks fjármálaráðherrans, eru áberandi mest hlynntir innheimtu veggjalda, það er 54,3 prósent.
Því næst koma kjósendur Samfylkingarinnar með 43,7 prósent, Framsóknarmenn og Sjálfstæðismenn 41,5 prósent en neikvæðin er ögn meiri í Sjálfstæðisflokknum en Framsóknarflokknum.
Í Vinstri grænum mælist 34,7 prósent stuðningur við veggjöld og eru þá upptaldir flokkarnir þar sem stuðningurinn við veggjöld er meiri en andstaðan.
37,6 prósent Pírata styðja veggjöld og 36,3 prósent kjósenda Flokks fólksins en andstaðan í þessum flokkum er þó meiri en stuðningurinn.
Í Miðflokknum styðja aðeins 28,8 prósent veggjöld og 57,6 prósent eru andvíg. Langmesta andstaðan mælist hins vegar í Sósíalistaflokknum þar sem 100 prósent svarenda sögðust andvígir veggjöldum. Hafa ber þó í huga að þeir voru aðeins 19 talsins.
Þegar litið er til annarra þátta sést til að mynda að meiri stuðningur er við veggjöld í eldri aldurshópum en hjá yngra fólki. Þá er einnig meiri stuðningur hjá hátekjufólki og þeim eru með meiri menntun en hjá lágtekjufólki og minna menntuðu.
Könnunin var gerð 25. til 31. mars. Svarendur voru 969 talsins.
