Í Hólagarði fóru fram hópslagsmál í dag en sjónarvottar segja tvo menn hafa verið að slást en einnig að þeir hafi ógnað ungmennum sem voru á svæðinu. Fréttablaðið greindi frá málinu og ræddi við vitni að slagsmálunum. „Við heyrðum börn gráta og sáum tvo menn takast á, annar þeirra virtist vera reyna að slást við börnin sem voru mjög skelkuð,“ sagði starfsmaður Afrozone í samtali við Fréttablaðið um málið.

DV fékk sent myndband af hópslagsmálunum sem eru vægast sagt hrottaleg. Sjá má nokkra aðila takast harkalega á, einn hrindir öðrum upp að rúðu á skyndibitastaðnum Pizzunni með þeim afleiðingum að rúðan brotnar. Þá má heyra börn gráta hástöfum vegna slagsmálanna en eins og áður segir var einhverjum börnum einnig ógnað. Myndbandið má sjá hér fyrir neðan.

Samkvæmt heimildum DV telur lögreglan að tengsl séu á milli árásanna í Borgarholtsskóla sem fóru fram í dag og þessarar við Hólagarð. Lögreglan var kölluð út vegna slagsmálanna í Hólagarði en samkvæmt vitnum Fréttablaðsins var allt búið þegar lögreglan mætti á svæðið.