Mannréttindadómstóll Evrópu hefur fallist á að taka mál foreldra, sem voru sviptir forræði yfir tveimur börnum sínum, til efnismeðferðar. Faðir barnanna var handtekinn 2015 grunaður um kynferðisbrot gegn þeim. Í kjölfarið var þeim komið í vistun utan heimilisins. Þau snéru aftur heim síðar þetta sama ár og bjuggu með móður sinni eftir að faðir þeirra flutti út af heimilinu. Annað barnið var síðan tekið af heimilinu og skömmu síðar hitt. Faðirinn var sýknaður af ákæru um kynferðisbrot gegn börnunum 2017 og var málinu ekki áfrýjað.

Fréttablaðið skýrir frá þessu í dag. Fram kemur að fyrir tveimur árum hafi héraðsdómur fallist á kröfu barnaverndarnefndar um að svipta báða foreldrana forræði yfir börnunum. Landsréttur sneri niðurstöðunni við og dæmdi foreldrunum í hag. Hæstiréttur tók málið fyrir í mars á síðasta ári og snéri dómi Landsréttar við og svipti foreldrana forræði.

Foreldrarnir kærðu málið til Mannréttindadómstólsins, hvort í sínu lagi. Þau byggja kærur sínar á 8. grein Mannréttindasáttmálans um friðhelgi einkalífs og fjölskyldu og segja að bæði málsmeðferðin og forsjársviptingin hafi brotið gegn ákvæðinu.

Mannréttindadómstólinn hefur beint spurningum um kæruefnið til ríkisins og hefur ríkið frest til að svara þeim. Fréttablaðið segist hafa heimildir fyrir að fleiri íslensk barnaverndarmál bíði ákvörðunar dómstólsins um hvort þau verði tekin til efnislegrar meðferðar.