Fyrrverandi landsliðsþjálfari og landsliðsmaður í handbolta, Þorbergur Aðalsteinsson, segir að atvik um borð í Wizz air flugvél í ágúst, þar sem hann átti að hafa verið flugdólgur, hafi verið blásið upp í íslenskum fjölmiðlum. Málið hafi verið fellt niður af lögreglu í Stafangri í Noregi og verður ekkert aðhafst í málinu. Eins þvertekur hann fyrir að hafa verið drukkinn í umrætt sinn.
Það var Hringbraut sem nafngreindi Þorberg sem meintan flugdólg sem hefði verið handtekinn í Noregi eftir atvik um borð í flugi Wizz air á leið frá Búdapest til Keflavíkur. Í þeirri frétt var fullyrt að Þorbergur yrði kærður fyrir brot gegn flugverndarlögum eftir að hann reyndi í annarlegu ástandi að brjóta sér leið inn í flugstjórnarklefa. Í frétt Hringbrautar sagði að þetta væri haft eftir öruggum heimildum. Þar var fullyrt að uppákomuna mætti rekja til gífurlegra vonbrigða Þorbergs þegar hann gat ekki fest kaup á súpu um borð í vélinni.
Þorbergur segir í færslu á Facebook að hann hafi ekki verið drukkinn. Hann hafi ekki snert áfengi í sjö ár sökum heilsubrests.
„Lögreglan í Stafangri í Noregi hefur fellt niður rannsókn máls á hendur mér, vegna atviks um borð í flugvél Wizz air um miðjan ágúst 2019. Eins og fram hefur komið hjá lögreglunni í Stafangri, var málið blásið upp í íslenskum fjölmiðlum, langt umfram tilefni.
Ég var ekki undir áhrifum áfengis þegar þetta atvik kom upp enda hef ég ekki snert áfengi frá árinu 2012 í kjölfar heilsubrests.
Því miður hef ég þurft að sitja undir ásökunum og sögusögnum frá því að íslenskir fjölmiðlar birtu nafn mitt í tengslum við þetta atvik og hefur það valdið mér bæði skaða og haft slæm áhrif á mína nánustu. Þess vegna er rétt að ég taki fram að lögreglan í Stafangri í Noregi mun ekkert aðhafast frekar í málinu og er því lokið af þeirra hálfu enda er ekkert tilefni til áframhaldandi rannsóknar né aðgerða.“
Rétt er að taka fram í frétt Hringbrautar var talað um að Þorbergur hefði verið lyfjaður og í annarlegu ástandi, en ekki fullyrt að hann hafi verið ölvaður, í færslu Þorbergs er þó aðeins vísað til áfengis.
