Ein stærstu tíðindin í kosningunum er mögulega sú staðreynd að fjórflokkurinn er allur með fylgishruni Vinstri Grænna. Flokkurinn fékk aðeins 2,3% atkvæða og þar með er ljóst að ráðherrar flokksins sem sóttust eftir endurkjöri, þau Svandís Svavarsdóttir og Guðmundur Ingi Guðbrandsson eru dottin út af þingi.

Mikil tíðindi eru einnig hjá Framsóknarmönnum sem misstu mikið fylgi. Flokkurinn fékk 7,8% fylgi á landsvísu en aðeins 4,4% og 4,0% í Reykjavíkurkjördæminu. Það þýðir að ráðherrarnir Ásmundur Einar Daðason, Lilja Alfreðsdóttir og Willum Þór Þórsson eru fallinn út af þingi. Ljóst var að róðurinn yrði þungur fyrir formann flokksins, Sigurð Inga Jóhannsson í suðurkjördæmi eftir að hafa látið eftir oddvitasæti kjördæmisins til Höllu Hrundar Logadóttur. Sigurður Ingi var í jöfnunarsætarússíbana alla nóttina og framundir morgun, iðulega þó úti, en að endingu datt hann inn sem jöfnunarþingmaður.

Eins og alþjóð veit þurrkuðust Píratar út af Alþingi Íslendinga. Það þýðir að þjóðþekktir þingmenn á borð við Þórhildi Sunnu Ævarsdóttur og Björn Leví Gunnarsson þurfa að snúa sér að öðru en þingmennsku.

Hjá Sjálfstæðisflokknum eru helstu tíðindin þau að Jón Gunnarsson, hinn þaulreyndi en umdeildi þingmaður, náði ekki kjöri.

Þá náði Jakob Frímann Magnússon ekki inn á þing en hann vatt kvæði sínu í kross og gekk til liðs við Miðflokkinn frá Flokki fólksins fyrir þessar kosningar.