Um páskana mátti víða á samfélagsmiðlum sjá samsetta mynd af Baldri Þórhallssyni, prófessor og forsetaframbjóðanda, og eiginmanni hans Felix Bergssyni. Þar mátti sjá hjónin kyssast, rifjuð upp umdeild ummæli þeirra og í bakgrunni mátti sjá Bessastaði með regnbogafánann að húni. Ástæðan fyrir því að myndin fór svo víða var sú að dreifing myndarinnar á Facebook var kostuð af Facebook-síðu sem bar yfirskriftina Bessastaðabaráttan.

Féll dreifingin í grýttan jarðveg á samfélagsmiðlunum og fékk hinn nafnlausi dreifandi það óþvegið í athugasemdakerfinu fyrir að dreifa hatursáróðri.

Netverjar voru snöggir til að leita að frekari upplýsingum um dreifandann og þegar bakgrunnsupplýsingar hinnar kostuðu dreifingar voru skoðaðar mátti sjá símanúmer dreifandans og tölvupóstinn, island@nuna.is, sem gefinn var upp.

Umrætt símanúmer er í eigu Ástþórs Magnússonar, mótframbjóðanda Baldurs og friðarsinna. Vefsíðan nuna.is er skráð á fyrirtæki Ástþórs, Álftaborgir ehf. en á henni kynnir Ástþór framboð sitt til Bessastaða í ár.

DV sendi Ástþóri fyrirspurn vegna málsins og var hann spurður hvort síðan væri á hans vegum og hvort skilaboðin sem væru í dreifingu rímuðu ekki illa við kjörorð framboð hans: „Með ÁST skal frið boða“.

Ástþór kom af fjöllum vegna málsins og sagðist hann ætla að kanna málið. Tveimur dögum síðar barst eftirfarandi yfirlýsing þar sem hann vísaði því alfarið á bug að tengjast síðunni.

„Þessi Facebook síða eða mynd er ekki á mínum vegum eða hluti af mínu framboði sem snýst um að Virkja Bessastaði til friðarmála og setja Ísland á alheimskortið sem herlaust land friðarins,“ skrifaði Ástþór.

Þess má geta að sama dag var umræddri Facebook-síðu eytt.