Samkvæmt því sem breska varnarmálaráðuneytið segir þá eru Rússar nú að undirbúa sig undir að verja Maríupol, eða það sem eftir er af borginni. Til að styrkja varnirnar eru þeir að búa til svokallaðar drekatennur.

Það er því ekki að sjá að Rússar séu á þeim buxunum að gefast upp og hörfa frá Úkraínu, að minnsta kosti ekki frá öllum þeim svæðum sem þeir hafa á sínu valdi.

Breska varnarmálaráðuneytið sagði í gær að Rússar séu að undirbúa harða vörn Maríupol sem hefur verið á þeirra valdi síðan í apríl. Úkraínskar hersveitir hafa sótt fram víða um Úkraínu síðustu vikur og mánuði og nálgast Maríupol. Við þessu eru Rússar að bregðast.

„Líklega er búið að setja upp drekatennur á milli Maríupol og bæjarins Nikolske og frá Maríupol að bænum Staryi Krym. Maríupol er brú Rússa til Krímskagans og mikilvæg fyrir Rússa,“ segir í stöðumati Bretanna.

Drekatönn er stór pýramídalaga steypuklumpur sem er notaður til að stöðva framsókn skriðdreka. Þetta var mikið notað í síðari heimsstyrjöldinni og nú eru Pútín og hans menn sagðir vera búnir að setja verksmiðju á laggirnar til að fjöldaframleiða drekatennur.

Bretarnir segja að Rússar muni leggja allt í sölurnar til að koma í veg fyrir að Úkraínumönnum takist að rjúfa varnarlínur þeirra við Maríupol. Bæði vegna mikilvægrar staðsetningar hennar og vegna þess hversu mörgum orustum þeir hafa tapað að undanförnu.