Samtökin segja að kínversk yfirvöld safni nú lífsýnum, DNA, úr fólki um allt Tíbet, þar á meðal úr leikskólabörnum án þess að fá samþykki foreldra þeirra. The Guardian skýrir frá þessu.
Í nýrri skýrslu samtakanna, sem var birt á mánudaginn, segir að ný gögn sýni að verið sé að safna lífsýnum úr Tíbetbúum á kerfisbundinn hátt. Fram kemur að engar opinberar upplýsingar liggi fyrir um að fólk geti neitað að láta lífsýni í té eða að lögreglan þurfi að hafa sannanir fyrir afbrotum viðkomandi til að mega taka þessi sýni. Segja samtökin að um alvarlegt mannréttindabrot sé að ræða sem sé „ekki hægt að réttlæta sem nauðsynlegt eða að meðalhófs sé gætt“.
Þessi söfnun lífsýna hófst 2019 sem hluti af verkefni á vegum lögreglunnar sem er ætlað að styrkja löggæsluna á grunnstigi hennar.
Í skýrslunni kemur fram að í sumum tilfellum hafi lífsýni verið tekin úr öllum íbúa þorpa, þar á meðal börnum undir fimm ára aldri, eða öllum karlmönnum.
Kínverjar réðust inn í Tíbet fyrir rúmlega 70 árum og hafa farið með yfirráð yfir landinu síðan. Tíbetbúar segja að um innrás hafi verið að ræða en kínversk stjórnvöld segja að um friðsamlega frelsun landsins undan guðveldisstjórn hafi verið að ræða.
