Real Madrid er sagt ætla að gera stórsókn eftir Michael Olise, sóknarmanni Bayern München, ef Florentino Pérez verður endurkjörinn forseti félagsins um helgina.

Samkvæmt fréttum á Spáni hyggst Real leggja fram tilboð upp á 150 milljónir evra, eða um 130 milljónir punda, í franska landsliðsmanninn. Pérez er talinn líklegur til að vinna forsetakosningarnar gegn Enrique Riquelme og gæti þá strax hafist handa við að styrkja leikmannahópinn.

Olise hefur slegið í gegn hjá Bayern síðan hann kom frá Crystal Palace árið 2024. Hann hefur hjálpað félaginu að vinna tvo þýska meistaratitla og er nú talinn einn besti sóknarmaður Evrópu.

Bayern hefur hins vegar engan áhuga á að selja leikmanninn. Samningur hans gildir til ársins 2029 og Uli Hoeness, heiðursforseti félagsins, hefur lýst honum sem „óseljanlegum“.

José Mourinho, sem er sagður taka við sem knattspyrnustjóri Real Madrid verði Pérez endurkjörinn, fylgdist með Olise í bikarúrslitaleik Þýskalands á síðasta tímabili og er talinn mikill aðdáandi hans.

Real hefur þegar verið virkt á félagaskiptamarkaðnum í sumar og meðal annars tryggt sér Ibrahima Konaté og Denzel Dumfries. Olise gæti þó orðið stærsta kaup félagsins á árinu.