Frá því í mars á síðasta ári og fram í nóvember létust 450.000 fleiri í aðildarríkjum ESB, að Írlandi undanskildu, en vænta mátti. Þetta sýna tölur frá Eurostat, tölfræðistofnun ESB, sem segir að þessar tölur sýni vel hver áhrif heimsfaraldurs kórónuveirunnar hafa verið.

Tölurnar eru byggðar á samanburði á dauðsföllum að meðaltali í sömu mánuðum á árunum 2016 til 2019. Eurostat segir að tölurnar veiti góða mynd af raunverulegum áhrifum og umfangi heimsfaraldursins því þær séu byggðar á öllum dauðsföllum, óháð dánarorsök. Tölur frá Írlandi voru ekki aðgengilegar og eru því ekki með í uppgjörinu.

Eurostat segir að umframdauðsföllin hafi náð hámarki í nóvember en þá hækkaði meðaltal dauðsfalla um 40%. Áður hafði toppnum verið náð í apríl þegar dauðsföllin voru 25% fleiri en vænta mátti.

Frá maí og fram í ágúst dró jafnt og þétt úr umframdauðsföllunum samhliða því að kórónuveirusmitum fækkaði. Þeim fór síðan að fjölga aftur í ágúst.

Í toppnum í nóvember fóru Búlgaría, Pólland og Slóvenía verst út úr umframdauðsföllunum. Í öllum löndunum voru dauðsföllin rúmlega 90% fleiri en að meðaltali árin á undan. Í Belgíu var hlutfallið um 60% og um 50% í Austurríki og á Ítalíu.