Vinum Freyju Egilsdóttur er að vonum illa brugðið eftir að skýrt var frá því að hún hefði verið myrt af fyrrum sambýlismanni sínum. Freyja, sem var 43 ára, lætur eftir sig tvö ung börn. Fyrrum sambýlismaður hennar, Flemming Mogensen, var í gær úrskurðaður í fjögurra vikna gæsluvarðhald.
SE og HØR ræddi við Steffen Petersen, vin Freyju, en hann ásamt tveimur öðrum fóru að leita að henni á þriðjudaginn þegar lögreglan lýsti eftir henni. Steffen og vinirnir stunduðu sjúkraliðanám með Freyju.
„Við erum í áfalli. Hún var svo góð, alltaf tilbúin til að hjálpa,“ sagði hann.
„Við töluðum um að við myndum örugglega ekki finna hana en við vildum gera eitthvað og sýna stuðning okkar,“ sagði hann einnig.
Eins og fram hefur komið þá var Freyja í vinnunni á dvalarheimili aldraðra í Odder á fimmtudag í síðustu viku. Hún lauk vaktinni um klukkan 23.30 og eftir það sást hún ekki aftur á lífi. Á laugardeginum var sms sent úr síma hennar til vaktstjóra, sem var í fríi og Freyja vissi að væri í fríi, um að hún kæmi ekki til vinnu vegna veikinda. Þetta þótti mjög ólíkt Freyju sem tilkynnti aldrei um veikindi með smáskilaboðum.
Steffen sagði að þegar hann og vinirnir komu að húsi Freyju í Malling á þriðjudaginn hafi þeir séð að fjöldi lögreglumanna var á vettvangi. „Það var búið að girða það alveg af, þeir einbeittu sér að litlum bletti framan við húsið,“ sagði hann.
Lögreglan fann síðan lík Freyju síðdegis á þriðjudaginn en Flemming hafði reynt að fela líkamshlutana, inni og úti.
Freyja er ekki fyrsta konan sem Flemming banaði.
Talið er að Freyja hafi ekki sjálf sent smáskilaboðin.
