Ef allt fer eins og nú er útlit fyrir má reikna með að fyrstu skammtarnir af bóluefni gegn kórónuveirunni, sem veldur COVID-19, berist hingað til lands á næstu mánuðum. Því er líklegt að hægt verði að hefja bólusetningar í janúar eða febrúar.

Morgunblaðið skýrir frá þessu í dag. Haft er eftir Haraldi Briem, fyrrverandi sóttvarnalækni, að dreifing bóluefnanna muni taka skamman tíma þegar öll tilskilin leyfi hafa fengist. „Ef allt gengur eftir gæti þetta orðið í janúar eða febrúar á næsta ári,“ er haft eftir Haraldi sem sagðist reikna með að framlínufólk og fólk með undirliggjandi sjúkdóma njóti forgangs.

Starfshópur vinnur nú að áætlun um fyrirkomulag dreifingar bóluefnisins að því er fram kemur í Morgunblaðinu. Í hópnum eru meðal annars fulltrúar sóttvarnalæknis og heilbrigðisráðuneytisins. Undirbúningurinn miðar að því að um leið og bóluefni fara í fjöldaframleiðslu gangi hlutirnir hratt fyrir sig.

Nú þegar eru bóluefni frá Pfizer og Moderna komin nokkuð langt í þróun og hafa prófanir lofað góðu.

Hér á landi mun Distica sjá um dreifingu og geymslu bóluefnanna. Morgunblaðið hefur eftir Júlíu Rósu Atladóttur, framkvæmdastjóra fyrirtækisins, að dreifing innanlands muni taka skamman tíma. Hún sagðist einnig eiga von á að bóluefnin muni koma í mörgum litlum skömmtum.

Samið hefur verið um aðgengi Íslands að kaupum á bóluefni í gegnum samninga ESB við lyfjafyrirtækin.