Sky-fréttastofan segir að í yfirlýsingu, sem Nýja IRA sendi til The Irish News, biðjist samtökin afsökunar á morðinu. Skilaboðin voru send til The Irish News og með þeim lykilorð til staðfestingar á að skilaboðin séu frá samtökunum. Í þeim segir meðal annars að samtökin hafi gefið sjálfboðaliðum þau fyrirmæli að gæta ítrustu varkárni í framtíðinni þegar þeir takast á við óvini samtakanna. Einnig segir að Lyra McKee hafi því miður verið drepin þar sem hún stóð aftan við vopnaðar sveitir bresku krúnunnar.
„IRA biður unnustu Lyra McKee, fjölskyldu og vini innilegrar og einlægrar afsökunar á dauða hennar.“
Til átaka kom á milli lýðveldissinna og lögreglunnar í Londonderry á fimmtudaginn þegar lýðveldissinnar ætluðu að minnast sjálfstæði Írlands. Lögreglan segir að um 50 bensínsprengjum hafi verið kastað í átt að henni í átökunum og að tveir bílar hafi orðið eldi að bráð.
McKee stóð nærri lögreglubíl þegar hún var skotin. Hún hafði skömmu áður tíst um „algjöra klikkun“ á svæðinu. Hún var fædd og uppalin í Belfast og var rísandi stjarna á sviði blaðamennsku. Hún fylgdist vel með og fjallaði ítarlega um átökin á Norður-Írlandi og sögu þeirra. Hún hafði einnig vakið mikla athygli fyrir umfjöllun sína um hvernig það var að alast upp sem samkynhneigð unglingsstúlka í Belfast.
Morðið á henni hefur vakið mikla athygli og beint sjónunum að hinu Nýja IRA. Ekki er ólíklegt að morðið verði samtökunum til trafala á næstunni en orðspor þeirra hefur beðið töluverðan skaða af morðinu meðal stuðningsmanna þeirra.
