Sérfræðingar segja að aðstæður hafi verið nær fullkomnar fyrir geitunga og vara við því að þeir geti orðið bæði fleiri og ágengari en venjulega í sumar.
Meindýraeyðingarfyrirtækið Rentokil segir geitungabúum hafa fjölgað um 61 prósent milli ára samkvæmt nýjustu tölum fyrirtækisins. Fyrirtækið telur að þetta sé merki um óvenju kröftugt upphaf geitungatímabilsins.
Paul Blackhurst, yfirmaður tæknideildar fyrirtækisins, segir við Daily Mail að geitungar séu ekki vandlátir á hvar þeir koma sér fyrir.
„Hvaða staður sem er sem er hlýr, í skjóli og rólegur getur orðið heimkynni geitunga,“ segir Blackhurst. Hann nefnir að bú hafi fundist meðal annars í töskum, í bílskúrum, inni í stígvélum og í garðhúsgögnum.
Fyrirtækið hefur birt myndir sem sýna geitungabú á óvenjulegum stöðum, meðal annars inni í bangsa.
Sérfræðingar segja geitungadrottningar vera vaknaðar úr vetrardvala vegna hlýnandi veðurs. Þótt búin séu lítil til að byrja með geti þau stækkað býsna hratt yfir sumarið ef aðstæður eru góðar.
„Það sem byrjar sem lítið bú að vori getur á skömmum tíma orðið að stórri og mjög virkri nýlendu,“ segir Blackhurst. Hann leggur áherslu á að mikilvægt sé að bregðast snemma við ef fólk verði vart við geitungabú.
Á samfélagsmiðlum má finna ýmis ráð um hvernig eigi að eyða geitungabúum, meðal annars með því að brenna þau, drekkja þeim í vatni eða lemja þau niður. Sérfræðingar vara þó eindregið við slíkum aðferðum.
„Að trufla geitungabú getur valdið árásargjarnri hegðun og aukið hættu á mörgum stungum,“ segir Blackhurst og ráðleggur fólki að leita til fagfólks ef grunur leikur á að bú séu til staðar.
Skordýrafræðingurinn og býflugnaræktandinn Laurence Edwards segir að óvenju hlýtt vor hafi skapað „fullkomnar aðstæður“ fyrir geitunga. Hann telur líklegt að þeir verði bæði fleiri og ágengari í sumar en venjulega.
