Pep Guardiola segir að hann muni ræða við stjórnarformann Manchester City, Khaldoon Al Mubarak, áður en hann tekur endanlega ákvörðun um framtíð sína hjá félaginu.

City missti endanlega af möguleikanum á enska meistaratitlinum í gær eftir 1-1 jafntefli gegn Bournemouth sem tryggði Arsenal titilinn.

Miklar fréttir hafa verið um að Guardiola muni hætta eftir tímabilið en hann vill ekki tjá sig um málið að svo stöddu.

„Fyrsta manneskjan sem ég þarf að tala við er stjórnarformaðurinn,“ sagði Guardiola eftir leikinn.

„Ég ætla ekki að tilkynna neitt hér. Ég þarf að ræða við stjórnarformanninn, leikmennina og starfsfólkið.“

Guardiola er samningsbundinn City til ársins 2027 en talið er að ákvæði í samningi hans geri honum kleift að fara í sumar.

Bernardo Silva, sem sjálfur hefur staðfest að hann muni yfirgefa City eftir tímabilið, sagðist ekki vita neitt um stöðu Guardiola.

„Það er hans ákvörðun og hans að tilkynna hana,“ sagði Portúgalinn.

Ef Guardiola hættir lýkur þar með tíu ára tímabili hans hjá City þar sem félagið vann sex enska meistaratitla og alls 20 titla undir hans stjórn.

Enzo Maresca hefur helst verið orðaður við stjórastarfið ef Guardiola hættir.