Tveir karlmenn sitja í gæsluvarðhaldi vegna alvarlegrar líkamsárásar sem framin var í Reykjavík í síðustu viku.

Þetta kemur fram í tilkynningu frá Lögreglunni á höfuðborgarsvæðinu.

Segir í tilkynningunni að annar mannanna sé á þrítugsaldri en hinn á fimmtugsaldri, og þeir hafi verið úrskurðaðir í gæsluvarðhald í þágu rannsóknarhagsmuna.

Segir enn fremur að tilkynnt hafi verið um málið síðastliðinn föstudag þegar karlmaður hafi fundist með alvarlega áverka utandyra í austurborginni. Áðurnefndir tveir menn hafi verið handteknir í tengslum við málið sama dag og þeir síðan á laugardag úrskurðaðir í gæsluvarðhald á grundvelli rannsóknarhagsmuna til 14. janúar. Gæsluvarðhaldið yfir báðum mönnunum hafi síðan verið framlengt að kröfu lögreglu í héraðsdómi í dag. Yngri maðurinn hafi verið úrskurðaður í fjögurra vikna gæsluvarðhald á grundvelli almannahagsmuna, en sá eldri í vikulangt gæsluvarðhald á grundvelli rannsóknarhagsmuna.

Hver líðan þolandans er kemur ekki fram í tilkynningunni.