Suzanne Morphew, 49 ára tveggja barna móðir, hvarf þann 10. maí 2020 eftir að hafa að sögn farið í hjólatúr nálægt heimili fjölskyldunnar í bænum Maysville í Colorado.
Umfangsmikil leit skilaði engum árangri og fyrstu vikurnar virtist eiginmaður hennar, Barry Morphew, helst vera syrgjandi maki sem kallaði opinberlega eftir hjálp við leitina.
En eftir því sem rannsókninni miðaði áfram fóru sífellt fleiri spurningar að beinast að Barry sjálfum.
Samkvæmt frásögn Barry hafði Suzanne farið út að hjóla á þennan örlagaríka dag meðan hann var sjálfur í vinnuferð. Hann sagði lögreglu að þau hefðu átt rólegt kvöld kvöldið áður, grillað steik og farið tiltölulega snemma í háttinn.
Dætur þeirra tveggja sendu móður sinni skilaboð um morguninn til að óska henni til hamingju með mæðradaginn, en fengu ólíkt venju ekkert svar frá henni.
Síðar sama dag tilkynnti nágranni Suzanne að hennar væri saknað og hófst umfangsmikil leit í fjalllendinu í Colorado í kjölfarið. Björgunarsveitir, sjálfboðaliðar og fulltrúar FBI tóku þátt í leitinni, en engin merki fundust um Suzanne.
Barry birti skömmu síðar myndband á samfélagsmiðlum þar sem hann grátbað fólk um upplýsingar og hvatti fólk til að hafa augun opin.
Þrátt fyrir opinberar yfirlýsingar fjölskyldunnar fór lögregla fljótt að beina sjónum sínum að sambandi hjónanna.
Rannsóknaryfirvöld töldu að Suzanne hefði um nokkurt skeið viljað skilja við Barry. Saksóknarar fullyrtu síðar að hún hefði sent honum skilaboð fáum dögum áður en hún hvarf þar sem hún gaf sterkt til kynna að hún vildi skilnað.
Rannsóknin leiddi einnig í ljós að Suzanne hafði átt í ástarsambandi við gamlan skólafélaga og að Barry hefði vitað af því.
Þegar rannsakendur ræddu við Barry um framhjáhaldið á hann samkvæmt rannsóknargögnum að hafa sagt eitthvað á þá leið að kannski væri þetta leið Guðs til að leysa úr einhverri flækju.
Yfirvöld töldu jafnframt að samband hjónanna hefði verið orðið mjög stirt og að Suzanne hefði óttast eiginmann sinn.
Systir Suzanne sagði síðar í viðtali að hún hefði gefið til kynna að hún hefði áhyggjur af eigin öryggi – eins og eitthvað væri jafnvel yfirvofandi og að Barry væri til alls vís.
Í handtökuheimild lögreglu kom fram að gögn úr farsíma Barry og úr bíl hans bentu til óvenjulegrar hegðunar daginn sem Suzanne hvarf.
Samkvæmt gögnum rannsóknarinnar sást hann aka á milli staða og losa sig við rusl snemma morguns daginn eftir að Suzanne hvarf, sem vakti athygli lögreglu. Þá setti hann símann sinn á flugstillingu skömmu eftir að hann kom heim síðdegis daginn áður en tilkynnt var um hvarfið.
Við yfirheyrslur sagði Barry einnig að hann hefði verið að elta jarðíkorna á lóð fjölskyldunnar með deyfibyssu sem notuð var fyrir villt dýr. Sú skýring vakti síðar sérstakan áhuga rannsakenda þegar við húsleit fundust róandi lyf, deyfisprautur og búnaður sem notaður er til að svæfa dýr.
Málið varð enn alvarlegra þegar réttarmeinafræðingar greindu síðar sömu efni í líkamsleifum Suzanne. Líkamsleifar sem fundust í september 2023, tæplega 80 kílómetrum frá heimili fjölskyldunnar, reyndust vera af Suzanne.
Krufning leiddi í ljós að dauði hennar væri manndráp. Sérstaka athygli vakti að í líkamsleifunum fundust efni sem notuð eru í deyfilyf fyrir villt dýr, þar á meðal lyfin Butorphanol, Azaperone og Medetomidine.
Réttarmeinafræðingar sögðu ekki unnt að staðfesta nákvæma dánarorsök, en töldu ljóst að Suzanne hefði látist af mannavöldum.
Barry var fyrst handtekinn í maí 2021 og ákærður fyrir morð, tilraun til að hafa áhrif á opinberan starfsmann og að hafa reynt að eyða sönnunargögnum. Frá upphafi hefur hann neitað öllum ásökunum.
Málið tók hins vegar óvænta stefnu árið 2022 þegar saksóknarar felldu ákærurnar niður. Ástæðan var meðal annars gagnrýni dómara á framsetningu saksóknara og ágreiningur um afhendingu gagna til verjenda. Ákærurnar voru þó felldar niður með þeim hætti að hægt væri að gefa þær út aftur síðar.
Barry hélt áfram að lýsa yfir sakleysi sínu og fjölskyldan – þar á meðal dætur þeirra hjóna – studdi hann opinberlega.
Í júní 2025 ákvað kviðdómur í Colorado að gefa út nýja ákæru á hendur Barry vegna morðsins á Suzanne.
Samkvæmt bandarískum fjölmiðlum byggir nýja ákæran meðal annars á réttarmeinafræðilegum gögnum, hegðunargögnum og nýjum upplýsingum sem komu fram eftir fund líkamsleifanna. Barry var handtekinn í Arizona og fluttur aftur til Colorado þar sem hann hefur enn á ný neitað allri sök.
Réttarhöld í málinu eiga samkvæmt núverandi áætlun að hefjast í október 2026 og er búist við að þau verði áberandi í bandarískum fjölmiðlum á haustmánuðum.
