Til stóð að skipið færi til Kanaríeyja og var greint frá því í gær að skipið hefði fengið grænt ljós á að leggja af stað frá Grænhöfðaeyjum. En yfirvöld á Kanaríeyjum eru þessu mótfallin.
Fernando Clavijo, forseti héraðsstjórnar Kanaríeyja, segir í samtali við COPE að hann hafi óskað eftir fundi með Pedro Sanchez, forsætisráðherra Spánar, vegna málsins.
Clavijo segist óttast um velferð og heilsu íbúa eyjanna og að þær upplýsingar sem yfirvöld hefðu fengið væru ófullnægjandi. „Ég get ekki leyft þessu skipi að koma til Kanaríeyja,“ ítrekaði hann.
Sem stendur eru tveir alvarlega veikir á skipinu og verður annar þeirra fluttur frá Grænhöfðaeyjum til Hollands með sjúkraflugi. Hinn, breskur læknir, verður fluttur með sjúkraflugi beint til Kanaríeyja samkvæmt spænskum fjölmiðlum.
Heilbrigðisráðuneyti Spánar sagði að skipið ætti að koma til eyjanna eftir þrjá til fjóra daga og bætti við að við komuna yrðu áhöfn og farþegar rannsakaðir, hlúð að þeim og þeir fluttir þaðan til sinna heimalanda.
Ráðuneytið sagði Alþjóðaheilbrigðismálastofnunina telja Kanaríeyjar vera næsta stað með fullnægjandi læknisaðstöðu til að taka á málinu.
Skemmtiferðafyrirtækið Oceanwide Expeditions sagði að áætlunin væri að sigla norður til Kanaríeyja, annaðhvort Gran Canaria eða Tenerife, sem tæki þrjá daga.
