Lögreglustjórinn á Suðurlandi hefur ákært konu með lögheimili í Bandaríkjunum fyrir hegningar- og umferðarlagabrot vegna umferðarlyss sem varð laugardaginn 7. desember árið 2024.

Konan ók þá bíl vestur eftir Suðurlandsvegi við Paradísarhelli í Rangárþingi eystra. Hún er sögð hafa verið óhæf til að stjórna bílnum vegna svefnleysis og hún hafi ekki gætt þess að hafa bílinn eins langt til hægri og unnt var og ekki gætt að því að nægileg hliðarbil væri milli bílsins og umferðar úr gagnstæðri átt. Ók hún út á rangan vegarhelming og framan á bíl sem ekið var úr gagnstæðri átt.

Afleiðingarnar voru þær að ökumaður bílsins sem kom úr gagnstæðri átt hlaut mikla áverka, meðal annars beinbrot og áverka á innri líffæri. Ökumaðurinn er Íslendingur.

Einnig slasaðist kona sem var farþegi í bílnum sem ákærða keyrði, hlaut hún bæði beinbrot og innvortis meiðsli. Hún krefst miskabóta frá ákærðu að fjárhæð 5 milljónir króna en ökumaðurinn sem slaðaðist krefst 3 milljóna.

Ákæran er birt í Lögbirtingablaðinu en málið verður þingfest við Héraðsdóm Suðurlands á Selfossi þann 11. júní næstkomandi.