The Guardian skýrir frá þessu. Fram kemur að svo virðist sem maðurinn hafi farið í nokkrar bólusetningarmiðstöðvar til að fá alla þessa skammta. Á Nýja-Sjálandi er hægt að bóka tíma í bólusetningu en einnig er víða hægt að mæta án tímapöntunar. Aðeins þarf að skýra frá nafni, fæðingardegi og heimilisfangi en skilríkja er ekki krafist.
Heilbrigðisráðuneytið segist taka málið mjög alvarlega. „Við höfum miklar áhyggjur af þessu og vinnum með viðeigandi stofnunum,“ sagð Astrid Koornneef, talskona ráðuneytisins og bætti við: „Að nota persónuupplýsingar annars einstaklings til að fá læknismeðferð er hættulegt. Þetta felur í sér áhættu fyrir þann sem er bólusettur og sá sem hann læst vera fær ranga skráningu í sjúkraskýrslur sínar sem sýna að bólusetningu sem ekki átti sér stað. Þetta gæti haft áhrif á hvernig tekið verður á heilbrigðismálum þeirra í framtíðinni.“
Helen Petousis-Harris, sérfræðingur í bólusetningum við háskólann í Auckland, sagði að engin sérstök gögn liggi fyrir um áhrif þess að fólk fái svo marga skammta af bóluefnum gegn kórónuveirunni en sagði að maðurinn muni væntanlega ekki verða fyrir alvarlegu tjóni. „Við vitum að stórir skammtar valda almennt hefðbundnum viðbrögðum við bólusetningu, til dæmis höfuðverk og hita og verkjum, það má því reikna með að honum hafi liðið ansi illa næsta dag,“ sagði hún. Hún sagðist jafnframt hafa heyrt um fleiri dæmi af þessu tagi og benti á að sú staðreynd að fólk þurfi ekki að framvísa skilríkjum, þegar það mætir í bólusetningu, geri kerfið viðkvæmt og auðvelt sé að misnota það.
Reiknað er með að 90% Nýsjálendinga, 12 ára og eldri, hafi lokið bólusetningu fyrir jól.
