Ef þú ætlar að fljúga með lággjaldaflugfélaginu Ryanair þá er eins gott að þú mætir tímanlega á flugvöllinn.

Félagið tilkynnti nýlega að frá og með 10. nóvember næstkomandi verði bæði innritun og afhendingu farangurs lokað klukkustund fyrir brottför en nú er lokað 40 mínútum áður.

Félagið segist með þessu vilja gefa farþegum sínum meiri tíma til að komast í gegnum vegabréfaeftirlit og öryggisleitina.

Segir félagið að þetta muni fækka þeim farþegum, sem eru ekki margir núna, sem missa af fluginu sínu af því að þeir sitja fastir í röðum á flugvellinum.

Til að mæta þessum breytingum mun Ryanair setja upp fleiri sjálfsafgreiðsluvélar á flugvöllunum sem félagið notar.