VG skýrir frá þessu og hefur eftir Ketil Lund, lögregluvarðstjóra sem stýrir aðgerðum á vettvangi, að vonast sé til að hægt verði að senda leitarmenn inn á flóðasvæðið í dag.
Það eru sérþjálfaðir leitarmenn frá sænsku USAR-sveitunum sem eiga að fara inn á svæðið ásamt norskum leitarhundum og stjórnendum þeirra.
Leit hefur nú staðið yfir linnulaust í rúmlega tvo sólarhringa en skriðan fór af stað um klukkan fjögur aðfaranótt miðvikudags. Lögreglan segir að enn sé von um að finna fólk á lífi og miðast leitin við það. 10 manns er saknað og segist lögreglan fullviss um að fólk sé á flóðasvæðinu en það geti bæði verið fleiri eða færri en þessir 10 sem er saknað.
Um 1.000 manns hafa þurft að yfirgefa heimili sín í bænum og íbúar hafa verið varaðir við að hugsanlega þurfi að grípa til enn frekari rýminga.