Bernie Madoff, einn mesti fjársvikari sögunnar, hefur sótt um að verða sleppt úr fangelsi af heilsufarsástæðum. Bernie, sem var dæmdur í 150 ára fangelsi árið 2009, er með ólæknandi nýrnasjúkdóm og heldur lögmaður hans því fram að Madoff eigi skammt eftir ólifað.

Madoff gerðist sekur um svokallað Ponzi-svindl en viðskiptavinir hans töpuðu milljörðum á milljarða ofan. Madoff er 81 árs og afplánar dóm sinn í alríkisfangelsinu í Butner í Norður-Karólínu. Sjúkdómurinn hefur gert það að verkum að Madoff þarnfast mikillar umönnunar.

Colleen Eren, prófessor í félagsfræði og afbrotafræði, skrifaði bók um glæpi Madoffs. Colleen er þeirrar skoðunar að bandarísk yfirvöld ættu að veita Madoff lausn af mannúðarástæðum. Það ætti raunar að vera reglan fyrir fanga sem glíma við ólæknandi sjúkdóm og hafa þegar setið inni í tíu ár samfleytt. Madoff hefur setið inni í ellefu ár. Fangelsisyfirvöld hafa ekki viljað verða við beiðni Madoffs í ljósi þess hversu alvarleg brot hans voru.

Eren segir að enginn efist um að glæpir Madoffs hafi verið alvarlegir og hann hafi valdið fjölda fólks miklu tjóni. Þrátt fyrir það séu mikilvægt að huga að mannúðarsjónarmiðum í tilfellum sem þessum.