Joe Biden, verðandi forseti Bandaríkjanna, hyggst leggja mikla áherslu á loftslagsmál. Í gær tilnefndi hann John Kerry, fyrrum utanríkisráðherra í ríkisstjórn Barack Obama, sem sérstakan sendifulltrúa sinn í loftslagsmálum. Þetta er um leið ofanígjöf við skort á áhuga og aðgerðum Donald Trump í málaflokknum.

Kerry mun njóta sömu stöðu og ráðherrar í ríkisstjórn Biden og sitja í þjóðaröryggisráði landsins.

„Þetta er í fyrsta sinn sem embættismaður, sem einbeitir sér að loftslagsmálum, situr í þjóðaröryggisráðinu. Þetta endurspeglar áherslur verðandi forseta á að takast á við loftslagsbreytingarnar sem ógna þjóðaröryggi,“ segir í yfirlýsingu frá valdaskiptateymi Biden. CNN skýrir frá þessu.

Skipun Kerry í embættið er staðfesting á stefnubreytingu bandarískra yfirvalda en Donald Trump hefur verið í algjörri afneitun hvað varðar loftslagsmálin og hefur hann ítrekað gert lítið úr vísindalegum gögnum hvað þau varðar. Hann hefur einnig kerfisbundið afnumið lög og reglur sem voru sett til verndar náttúrunni. Hann mun því seint teljast vinur náttúrunnar og umhverfisins.

„Það verður heiður að starfa með bandamönnum okkar og samstarfsaðilum, samhliða rísandi ungum leiðtogum í loftslagshreyfingunni, við að takast á við loftslagsvandann af þeirri alvöru og hraða sem á þarf að halda,“ segir í yfirlýsingu frá John Kerry.

Kerry hefur lengi unnið að loftslagsmálum. Sem utanríkisráðherra var hann í lykilhlutverki þegar Parísarsáttmálinn var samþykktur 2015  en tæplega 200 ríki skuldbundu sig til að uppfylla hann. Sáttmálanum var ætlað að takast á við loftslagsbreytingarnar og áhrif þeirra. Trump dró Bandaríkin út úr samningnum en Biden hefur heitið því að Bandaríkin gangi aftur inn í samninginn á fyrsta degi hans í embætti.