Victor Lindelöf fær sérstakan stuðning á áhorfendapöllunum þegar Aston Villa mætir Freiburg í úrslitaleik Evrópudeildarinnar í kvöld. Eiginkona sænska varnarmannsins, Maja Lindelöf, verður á meðal áhorfenda en hún hefur oft verið kölluð „heitasta WAG í ensku úrvalsdeildinni“.
Lindelöf gekk til liðs við Aston Villa eftir átta ára dvöl hjá Manchester United og hefur hjálpað liðinu alla leið í úrslitaleik Evrópudeildarinnar á sínu fyrsta tímabili hjá félaginu.
Svíinn hefur áður unnið bikara á Englandi, meðal annars deildabikarinn árið 2023 og FA-bikarinn árið 2024 með United. Hann hefur þó tvisvar tapað í úrslitum Evrópudeildarinnar, gegn Villarreal árið 2021 og Tottenham árið 2025.
Eiginkona hans Maja hefur verið mikið í sviðsljósinu undanfarin ár. Hún var valin „fallegasta WAG ensku úrvalsdeildarinnar“ af vefsíðunni AttractivenessTest.com og fékk þar einkunnina 9,7 af 10.
Maja er athafnakona og áhrifavaldur og hefur byggt upp stóran fylgjendahóp á samfélagsmiðlum síðan fjölskyldan flutti til Englands árið 2017 þegar Lindelöf kom til Manchester United frá Benfica fyrir 31 milljón punda.
Nú vonast hjónin til að bæta Evrópudeildarbikarnum við safnið á miðvikudagskvöld.
