Hildur skrifaði færslu á Facebook í gær um málið sem vakti talsverða athygli. Reiknaði Hildur að fyrir hverja hlustun fái hún rétt rúmlega 25 krónur. Þá reiknaði hún út að fyrir hvert streymi á bókinni Urðarhvarfi fái hún greiddar heilar 19 krónur.
„Þetta er bara svo fáránlegt!,“ segir Hildur í athugasemd við eigin færslu og bætir svo við að til samanburðar fái hún greiddar 172 krónur fyrir hvert útlán á bókasafni.
Margir hafa lagt orð í belg við færslu Hildar og í þeim hópi eru meðal annars rithöfundar.
„Það er svakalegt – þannig að til að fá ein mánaðarlaun – hefði þurft 30 sinnum meiri hlustun – eða 20.000 hlustanir,“ segir Andri Snær Magnason. „Minnstu ekki á þetta ógrátandi,“ segir rithöfundurinn Þórdís Gísladóttir.
„Eigi skal gráta Björn bónda, heldur safna liði og leita hefnda. Skiptum út síðasta orðinu og setjum t.d. inn orðið réttlæti í eignarfalli í staðinn. Við erum í fjölmennum samtökum, þau eru við stýrið. Siglum,“ segir Vigdís Grímsdóttir og svarar Hildur því til að hún hafi beðið um að bækurnar hennar yrðu teknar út af Storytel.
