Kvenréttindafélag Íslands birtir próf þar sem spurt er út í vitneskju fólks um rétt kvenna til þungunarrofs. Meðal annars er rifjað upp hvaða alþingismenn greiddu atkvæði gegn nýjum lögum um þungunarrof árið 2019.

„Árið 2019 voru ný þungunarrofslög samþykkt á Íslandi sem lögðu áherslu á sjálfsákvörðunarrétt og sjálfsforræði yfir eigin líkama. Hversu hátt hlutfall þingmanna greiddi atkvæði gegn frumvarpinu?“ er spurt í prófinu sem hefur vakið mikla athygli.

Höskuldarviðvörun: Svarið er 29 prósent. En alls greiddu 18 þingmenn atkvæði gegn löggjöfinni og 3 sátu hjá.

Í umræðum á samfélagsmiðlum um prófið er víða rifjað upp hvaða þingmenn þetta voru, sem vildu ekki víkka út rétt til þungunarrofs. Eru þeir eftirfarandi.

Báðir þingmenn Flokks fólksins, þau Inga Sæland og Guðmundur Ingi Kristinsson.

Átta af níu þingmönnum Miðflokks. Sigmundur Davíð Gunnlaugsson, Bergþór Ólason, Karl Gauti Hjaltason, Ólafur Ísleifsson, Þorsteinn Sæmundsson, Gunnar Bragi Sveinsson, Jón Þór Þorvaldsson og Birgir Þórarinsson. Eina konan í þingflokknum, Anna Kolbrún Árnadóttir, sat hjá.

Átta af fjórtán þingmönnum Sjálfstæðisflokks. Bjarni Benediktsson, Jón Gunnarsson, Sigríður Á. Andersen, Ásmundur Friðriksson, Óli Björn Kárason, Páll Magnússon, Brynjar Níelsson og Birgir Ármannsson. Tveir þingmenn sátu hjá, Haraldur Benediktsson og Njáll Trausti Friðbertsson.

Frumvarpið var samþykkt með fjórum atkvæðum Sjálfstæðisflokks og öllum átta atkvæðum Framsóknarflokks, ellefu atkvæðum Vinstri grænna, sjö atkvæðum Samfylkingar, sex atkvæðum Pírata og fjórum atkvæðum Viðreisnar.