Íslenska lögreglan tók þátt í að taka niður BreachForums, risastóran markað fyrir netglæpamenn í dag. Vefsíðan var haldlögð sem og Telegram síða hópsins sem telur meira en 300 þúsund meðlimi.
Aðgerðin var unnin í samstarfi við bandarísku alríkislögregluna FBI og lögregluyfirvöld í Ástralíu, Nýja Sjálandi, Sviss, Bretlandi og Úkraínu. Voru síðurnar teknar niður snemma í dag og í staðinn sett upp skilti þar sem niðurtakan var tilkynnt.
BreachForums, sem tók við af RaidForums, var markaður þar sem netglæpamenn gátu keypt og selt ýmsan ólöglegan netvarning. Svo sem stolna upplýsingabanka, auðkenni fólks, þjónustu hakkara og ýmis forrit til þess að hakka með. Meðlimir voru í kringum 340 þúsund.
Bandaríska alríkislögreglan hefur haft hópinn til rannsóknar um nokkurt skeið. Fyrst var RaidForums síðan tekin niður og nú BreachForums. Í mars á síðasta ári var stofnandinn Conor Brian Fitzpatrick handtekinn í New York borg.
Í auglýsingu lögreglunnar má sjá að mynd af fangelsisrimlum yfir tveimur notendamyndum (avatars), það er myndir notendanna Baphomet og ShinyHunters. Gefur það hugsanlega til kynna að þessir tveir meðlimir séu í haldi lögreglu.
Ekki kemur fram hver aðkoma hvers lögregluembættis sé í aðgerðinni, en ljóst er að hún er leidd af hinum bandarísku.
Stutt er síðan íslenska lögreglan tók þátt í svipaðri aðgerð, með FBI, Europol og lögreglunni í Portúgal. Það er í lok apríl þegar umsvifamikil svikastarfsemi með rafmyntir var stöðvuð hjá fyrirtækinu Samourai og tveir einstaklingar handteknir beggja vegna Atlantsála.
