Salmar, eitt af stærstu fiskeldisfyrirtækjum heims og eigandi hins íslenska Arnarlax, hefur orðið fyrir linnulausum árásum marglytta á stöðvum sínum í norðurhluta Noregs á undanförnum mánuðum. Hefur þetta valdið því að farga þurfti mikið af eldisfisknum.

„Það eru meira en tuttugu ár síðan Salmar lenti í sambærilegum árásum marglytta í Noregi sagði Frode Arntsen, stjórnarformaður fyrirtækisins þegar hann kynnti ársuppgjör fyrirtækisins. „Því miður þá hafa þeir sem upplifðu árásina fyrir tuttugu árum sagt mér að þetta muni ekki lagast strax. Marglytturnar munu halda árásum sínum áfram í vetur, jafn vel fram í maí.“

Marglytturnar eru svo kallaðar „streng marglyttur“ sem minna um margt á gaddavír og geta náð þriggja metra lengd hvert dýr. Marglytturnar veiða í torfum og mynda eins konar net til þess að grípa fæðu sína, sem er aðallega svif. Fæðuna drepa marglytturnar með eitri.

Þó að eldislax sé ekki fæða marglytta þá getur hann farið mjög illa í árásum sem þessum og í mörgum tilfellum drepist. Einkum smæstu fiskarnir.

Árásirnar hófust í nóvember síðastliðnum og þurfti að grípa til þess að fara milljónum illa farinna fiska. Á tveimur seinustu mánuðum ársins þurfti að farga alls 20 þúsund tonnum af fiski.

Engu að síður telur fyrirtækið að afkoman fyrir árið í heild hafi verið mjög góð. En auk Noregs rekur Salmar fiskeldi bæði á Íslandi og í Skotlandi. Framleiðslan jókst um 31 prósent. Tekjurnar hækkuðu úr 4,5 milljarði norskra króna í 8,1 milljarð.