10-11 og Iceland hafa bæst í hóp þeirra verslana sem hafa hætt sölu á Brúneggjum í kjölfar umfjöllunar Kastljóss fyrr í vikunni. Þetta kemur fram á mbl.is.
Í Kastljósþættinum kom fram að neytendur hafa um árabil verið blekktir með merkingum þess efnis að eggjaframleiðsla fyrirtækisins væri vistvæn og varphænurnar frjálsar. Í mörg ár hefur Matvælastofnun reynt að fá eigendur Brúneggja til að bæta úr aðbúnaði dýranna en í Kastljósi í gær var sýnt myndefni sem sýnir fram á afar slæmar aðstæður í húsum.
DV greindi frá því í gær að Bónus og Hagkaup hefðu ákveðið að taka eggin úr sölu, semog Melabúðin og Krónan.
Á vef mbl.is kemur fram að stjórnendur 10-11 hyggist heimsækja Brúnegg á næstu dögum og fá að sjá aðstöðuna en í kjölfarið muni vera tekin ákvörðun um hvort eggin verði tekin aftur í sölu eða ekki.
