„Eftir umfjöllun Kastljóss um blekkingar gagnvart neytendum og brot á reglum um velferð dýra hafa Brúnegg verið tekin úr sölu í öllum verslunum okkar,“ segir í stuttri yfirlýsingu sem birtist á Facebook-síðu Bónuss.

Þetta gerist eftir afhjúpun Kastljóss í gærkvöldi en í þættinum kom fram að neytendur hafa um árabil verið blekktir með merkingum þess efnis að eggjaframleiðsla fyrirtækisins væri vistvæn og varphænurnar frjálsar. Í mörg ár hefur Matvælastofnun reynt að fá eigendur Brúneggja til að bæta úr aðbúnaði dýranna en í Kastljósi í gær var sýnt myndefni sem sýnir fram á afar slæmar aðstæður í húsum.

Í gærkvöldi tilkynnti Melabúðin að hún væri hætt að selja egg frá fyrirtækinu og fylgdi Krónan í kjölfarið. Í morgun bættust Bónus og Hagkaup við. „Mánudaginn 28.11 voru öll egg frá Brúnegg ehf. tekin úr sölu í öllum verslunum Hagkaups,“ segir á Facebook-síðu Hagkaupa.