Fulltrúar minnihlutans í bæjarstjórn Kópavogs eru óánægðir með skipun starfshóps til að fjalla um framtíð Salarins í Hamraborg. Saka þeir Ásdísi Kristjánsdóttur, bæjarstjóra um takmarkaðan skilning á lýðræðinu.
DV greindi frá því í október að framtíð Salarins væri í uppnámi. Ýmis samtök tónlistarfólks hafa lýst áhyggjum sínum af því að starfsemin yrði boðin út og Salnum breytt í skemmtistað. Ásdís sagði það „nánast útilokað“ og að skipaður yrði starfshópur.
Fulltrúar minnihlutans, Vina Kópavogar, Viðreisnar, Samfylkingar og Pírata, harma litla aðkomu að téðum starfshóp. Í bókun á fundi Lista og menningarráðs í vikunni mótmæltu þeir harðlega að ráðið væri sniðgengið í máli sem heyrði undir það. Fyrir lægju þrjár bókanir um mikilvægi þess að í starfshópinn séu skipaðir fulltrúar úr meiri og minnihluta ráðsins sem og fulltrúi frá Tónlistarskóla Kópavogs.
„Framferði bæjarstjóra ber enn og aftur vitni um takkaðan skilning og áhuga á lýðræði. Augljóst er að um málamyndagjörning er að ræða vegna knapps tímafrests og fárra funda,“ segir í bókuninni.
Fulltrúar meirihlutans, Sjálfstæðisflokks og Framsóknarflokks, eru hins vegar sáttir.
„Bæjarstjórn samþykkti á fundi sínum 25.4.2023 að bæjarstjóri myndi skipa starfshóp Salarins. Eftir að bæjarstjóri hafði leitaði álits hjá formanni FÍH varð niðurstaða hennar þessi. Fulltrúar meirihlutans fagnar stofnun starfshóps um málefni Salarins og vonar að tillögur sem koma frá starfshópnum geti nýst vel í áframhaldandi vinnu lista- og menningarráðs,“ segir í þeirra bókun.
