Alþjóða heilbrigðisstofnunin hefur sent frá sér viðvörun vegna heimsfaraldurs fuglaflensu. Nú þegar hefur veiran fundist í spendýrum og í Perú hafa sex hundruð sæljón drepist vegna veirunnar. Sá möguleiki er fyrir hendi að veiran geti smitast í menn. Brigitte Brugger dýralæknir alifuglasjúkdóma hjá MAST ræðir málið við Margréti Erlu Maack.

Hópur pólskra kvenna hér á landi hefur orðið fyrir barðinu á eftirlýstum fjársvikara sem hefur starfsemi hér á landi. Konurnar hafa kært málið til lögreglu. DV hefur fjallað um málið í vikunni. Ágúst Borgþór Sverrisson blaðamaður á DV ræðir málið við Nínu Richter.

Bakarí og listagallerí er dæmi um rekstur í húsnæði sem áður hýsti bensínstöðvar. Blaðamaðurinn og fyrrverandi bensínsölumaðurinn Þórarinn Þórarinsson fer í saumana á þessum breytingum í viðtali við Sigmund Erni Rúnarsson.
Blaðamennirnir Erla María Davíðsdóttir og Helgi Steinar Gunnlaugsson mæta í fréttamannaspjall. Erla María ræðir kjaradeilu Eflingar og Samtaka atvinnulífsins og greinir frá atburðum dagsins. Hún ræðir sömuleiðis fljúgandi furðuhluti sem skotnir hafa verið af himni yfir Kanada og víðar. Helgi Steinar ræðir fréttaskýringu sem birtist í Fréttablaðinu 15. febrúar þar sem teikn eru á lofti um að það borgi sig ekki fyrir neytendur að halda tryggð við tryggingafélög hér á landi.

Fréttavaktin 15. febrúar 2023