Rússnesk herflugvél var notuð til að flytja 140 milljónir evra í reiðufé til Íran í ágúst. Þetta var greiðsla fyrir tugi íranskra dróna, sjálfsmorðsdróna sem Rússar hafa beitt gegn Úkraínumönnum að undanförnu. Auk peninga flutti flugvélin þrjú vestræn vopn sem Rússar höfðu komist yfir í Úkraínu. Þetta voru bresk NLAW skriðdrekaflaug, bandarísk Javelin skriðdrekaflaug og Stinger loftvarnaflaug.

Sky News skýrir frá þessu og segir að vélin hafi lent í Teheran snemma að morgni 20. ágúst. Þetta er haft eftir ónafngreindum heimildarmanni. Hann sagði að vopnin þrjú veiti Íranska byltingarhernum tækifæri til að rannsaka þau og hugsanlega nýta sér tæknina til að smíða álíka vopn. Íranar þykja mjög færir í hermismíðum.

Fyrir þetta fengu Rússar rúmlega 160 dróna, þar á meðal 100 Shahed-136 dróna sem hafa verið nefndir sjálfsmorðsdrónar því þeir springa þegar þeir lenda á skotmarki sínu.

Heimildarmaðurinn sagði að Rússar og Íranar hafi á síðustu dögum samið um ný álíka viðskipti að verðmæti 200 milljóna evra. Rússar fái því aðra stóra sendingu af drónum frá Íran á næstunni.